New Wings

एतैरन्यैश्च बहुभिर्वाक्यैर्वाक्यविशारदः ।
मां प्रशस्याभ्यनुज्ञाप्य प्रविष्टस्स स्वमालयम् ॥

etairanyaiśca bahubhirvākyairvākyaviśāradaḥ |
māṃ praśasyābhyanujñāpya praviṣṭassa svamālayam ||

कन्दरात्तु विसर्पित्वा पर्वतस्य शनैश्शनैः ।
अहं विन्ध्यं समारुह्य भवतः प्रतिपालये ॥

kandarāttu visarpitvā parvatasya śanaiśśanaiḥ |
ahaṃ vindhyaṃ samāruhya bhavataḥ pratipālaye ||

अद्य त्वेतस्य कालस्य साग्रं वर्षशतं गतम् ।
देशकालप्रतीक्षोऽस्मि हृदि कृत्वा मुनेर्वचः ॥

adya tvetasya kālasya sāgraṃ varṣaśataṃ gatam |
deśakālapratīkṣo'smi hṛdi kṛtvā munervacaḥ ||

महाप्रस्थानमासाद्य स्वर्गते तु निशाकरे ।
मां निर्दहति सन्तापो वितर्कैर्बहुभिर्वृतम् ॥

mahāprasthānamāsādya svargate tu niśākare |
māṃ nirdahati santāpo vitarkairbahubhirvṛtam ||

उत्थितां मरणे बुद्धिं मुनिवाक्यैर्निवर्तये ।
बुद्धिर्या तेन मे दत्ता प्राणानां रक्षणाय तु ।
सा मेऽपनयते दुःखं दीप्तेवाग्निशिखा तमः ॥

utthitāṃ maraṇe buddhiṃ munivākyairnivartaye |
buddhiryā tena me dattā prāṇānāṃ rakṣaṇāya tu |
sā me'panayate duḥkhaṃ dīptevāgniśikhā tamaḥ ||

बुद्ध्यता च मया वीर्यं रावणस्य दुरात्मनः ।
पुत्रस्सन्तर्जितो वाग्भिर्न त्राता मैथिली कथम् ॥

buddhyatā ca mayā vīryaṃ rāvaṇasya durātmanaḥ |
putrassantarjito vāgbhirna trātā maithilī katham ||

तस्या विलपितं श्रुत्वा तौ च सीताविनाकृतौ ।
न मे दशरथस्नेहात्पुत्रेणोत्पादितं प्रियम् ॥

tasyā vilapitaṃ śrutvā tau ca sītāvinākṛtau |
na me daśarathasnehātputreṇotpāditaṃ priyam ||

तस्य त्वेवं ब्रुवाणस्य सम्पातेर्वानरैस्सह ।
उत्पेततुस्तदा पक्षौ समक्षं वनचारिणाम् ॥

tasya tvevaṃ bruvāṇasya sampātervānaraissaha |
utpetatustadā pakṣau samakṣaṃ vanacāriṇām ||

स दृष्ट्वा स्वां तनुं पक्षैरुद्गतैररुणच्छदैः ।
प्रहर्षमतुलं लेभे वानरांश्चेदमब्रवीत् ॥

sa dṛṣṭvā svāṃ tanuṃ pakṣairudgatairaruṇacchadaiḥ |
praharṣamatulaṃ lebhe vānarāṃścedamabravīt ||

ऋषेर्निशाकरस्यैव प्रभावादमितात्मनः ।
आदित्यरश्मिनिर्दग्धौ पक्षौ मे पुनरुपस्थितौ ॥

ṛṣerniśākarasyaiva prabhāvādamitātmanaḥ |
ādityaraśminirdagdhau pakṣau me punarupasthitau ||

यौवने वर्तमानस्य ममासीद्यः पराक्रमः ।
तमेवाद्यावगच्छामि बलं पौरुषमेव च ॥

yauvane vartamānasya mamāsīdyaḥ parākramaḥ |
tamevādyāvagacchāmi balaṃ pauruṣameva ca ||

सर्वथा क्रियतां यत्न स्सीतामधिगमिष्यथ ।
पक्षलाभो ममायं वस्सिद्धिप्रत्ययकारकः ॥

sarvathā kriyatāṃ yatna ssītāmadhigamiṣyatha |
pakṣalābho mamāyaṃ vassiddhipratyayakārakaḥ ||

इत्युक्त्वा स तान्हरीन् सर्वान्सम्पातिः पतगोत्तमः ।
उत्पपात गिरेश्शृङ्गाज्जिज्ञासुः खगमो गतिम् ॥

ityuktvā sa tānharīn sarvānsampātiḥ patagottamaḥ |
utpapāta gireśśṛṅgājjijñāsuḥ khagamo gatim ||

तस्य तद्वचनं श्रुत्वा प्रतिसंहृष्टमानसाः ।
बभूवुर्हरिशार्दूला विक्रमाभ्युदयोन्मुखाः ॥

tasya tadvacanaṃ śrutvā pratisaṃhṛṣṭamānasāḥ |
babhūvurhariśārdūlā vikramābhyudayonmukhāḥ ||

अथ पवनसमानविक्रमाः प्लवगवराः प्रतिलब्धपौरुषाः ।
अभिजिदभिमुखा दिशं ययु र्जनकसुतापरिमार्गणोन्मुखाः ॥

atha pavanasamānavikramāḥ plavagavarāḥ pratilabdhapauruṣāḥ |
abhijidabhimukhā diśaṃ yayu rjanakasutāparimārgaṇonmukhāḥ ||