Her Story

इत्युक्त्वा हनुमांस्तत्र पुनः कृष्णाजिनाम्बराम् ।
अब्रवीत्तां महाभागां तापसीं धर्मचारिणीम् ॥

ityuktvā hanumāṃstatra punaḥ kṛṣṇājināmbarām |
abravīttāṃ mahābhāgāṃ tāpasīṃ dharmacāriṇīm ||

इदं प्रविष्टास्सहसा बिलं तिमिरसंवृतम् ।
क्षुत्पिपासापरिश्रान्ताः परिखिन्नाश्च सर्वशः ॥

idaṃ praviṣṭāssahasā bilaṃ timirasaṃvṛtam |
kṣutpipāsāpariśrāntāḥ parikhinnāśca sarvaśaḥ ||

महद्धरण्या विवरं प्रविष्टाः स्म पिपासिताः ।
इमां स्त्वेवंविधान्भावान्विविधानद्भुतोपमान् ।
दृष्ट्वा वयं प्रव्यथितास्सम्भ्रान्ता नष्टचेतसः ॥

mahaddharaṇyā vivaraṃ praviṣṭāḥ sma pipāsitāḥ |
imāṃ stvevaṃvidhānbhāvānvividhānadbhutopamān |
dṛṣṭvā vayaṃ pravyathitāssambhrāntā naṣṭacetasaḥ ||

कस्यैते काञ्चना वृक्षास्तरुणादित्यसन्निभाः ।
शुचीन्यभ्यवहार्याणि मूलानि च फलानि च ।
काञ्चनानि विमानानि राजतानि गृहाणि च ।
तपनीयगवाक्षाणि मणिजालावृतानि च ॥

kasyaite kāñcanā vṛkṣāstaruṇādityasannibhāḥ |
śucīnyabhyavahāryāṇi mūlāni ca phalāni ca |
kāñcanāni vimānāni rājatāni gṛhāṇi ca |
tapanīyagavākṣāṇi maṇijālāvṛtāni ca ||

पुष्पिताः फलवन्तश्च पुण्यास्सुरभिगन्धिनः ।
इमे जाम्बूनदमयाः पादपाः कस्य तेजसा ।
काञ्चनानि च पद्मानि जातानि विमले जले ।
कथं मत्स्याश्च सौवर्णा दृश्यन्ते सह कच्छपैः ।
आत्मानमनुभावं च कस्य चैतत्तपोबलम् ।
अजानतां न स्सर्वेषां सर्वमाख्यातुमर्हसि ॥

puṣpitāḥ phalavantaśca puṇyāssurabhigandhinaḥ |
ime jāmbūnadamayāḥ pādapāḥ kasya tejasā |
kāñcanāni ca padmāni jātāni vimale jale |
kathaṃ matsyāśca sauvarṇā dṛśyante saha kacchapaiḥ |
ātmānamanubhāvaṃ ca kasya caitattapobalam |
ajānatāṃ na ssarveṣāṃ sarvamākhyātumarhasi ||

एवमुक्ता हनुमता तापसी धर्मचारिणी ।
प्रत्युवाच हनूमन्तं सर्वभूतहिते रता ॥

evamuktā hanumatā tāpasī dharmacāriṇī |
pratyuvāca hanūmantaṃ sarvabhūtahite ratā ||

मयो नाम महातेजा मायावी वानरर्षभः ।
तेनेदं निर्मितं सर्वं मायया काञ्चनं वनम् ॥

mayo nāma mahātejā māyāvī vānararṣabhaḥ |
tenedaṃ nirmitaṃ sarvaṃ māyayā kāñcanaṃ vanam ||

पुरा दानवमुख्यानां विश्वकर्मा बभूव ह ।
येनेदं काञ्चनं दिव्यं निर्मितं भवनोत्तमम् ॥

purā dānavamukhyānāṃ viśvakarmā babhūva ha |
yenedaṃ kāñcanaṃ divyaṃ nirmitaṃ bhavanottamam ||

स तु वर्षसहस्राणि तपस्तप्त्वा महावने ।
पितामहाद्वरं लेभे सर्वमौशनसं धनम् ॥

sa tu varṣasahasrāṇi tapastaptvā mahāvane |
pitāmahādvaraṃ lebhe sarvamauśanasaṃ dhanam ||

वनं विधाय बलवान्सर्वकामेश्वरस्तदा ।
उवास सुखितः कालं कञ्चिदस्मिन्महावने ॥

vanaṃ vidhāya balavānsarvakāmeśvarastadā |
uvāsa sukhitaḥ kālaṃ kañcidasminmahāvane ||

तमप्सरसि हेमायां सक्तं दानवपुङ्गवम् ।
विक्रम्यैवाशनिं गृह्य जघानेत्रः पुरन्दरः ॥

tamapsarasi hemāyāṃ saktaṃ dānavapuṅgavam |
vikramyaivāśaniṃ gṛhya jaghānetraḥ purandaraḥ ||

इदं च ब्रह्मणा दत्तं हेमायै वनमुत्तमम् ।
शाश्वताः कामभोगश्च गृहं चेदं हिरण्मयम् ॥

idaṃ ca brahmaṇā dattaṃ hemāyai vanamuttamam |
śāśvatāḥ kāmabhogaśca gṛhaṃ cedaṃ hiraṇmayam ||

दुहिता मेरुसावर्णेरहं तस्यास्स्वयंप्रभा ।
इदं रक्षामि भवनं हेमाया वानरोत्तम ॥

duhitā merusāvarṇerahaṃ tasyāssvayaṃprabhā |
idaṃ rakṣāmi bhavanaṃ hemāyā vānarottama ||

मम प्रियसखी हेमा नृत्तगीतविशारदा ।
तया दत्तवरा चास्मि रक्षामि भवनोत्तमम् ॥

mama priyasakhī hemā nṛttagītaviśāradā |
tayā dattavarā cāsmi rakṣāmi bhavanottamam ||

किं कार्यं कस्य वा हेतोः कान्ताराणि प्रपश्यथ ।
कथं चेदं वनं दुर्गं युष्माभिरुपलक्षितम् ॥

kiṃ kāryaṃ kasya vā hetoḥ kāntārāṇi prapaśyatha |
kathaṃ cedaṃ vanaṃ durgaṃ yuṣmābhirupalakṣitam ||

इमान्यभ्यवहार्याणि मूलानि च फलानि च ।
भुक्त्वा पीत्वा च पानीयं सर्वं मे वक्तुमर्हथ ॥

imānyabhyavahāryāṇi mūlāni ca phalāni ca |
bhuktvā pītvā ca pānīyaṃ sarvaṃ me vaktumarhatha ||